3 желтоқсан–Халықаралық мүгедектер күніне орай «Рухы күштілер» атты көз мүгедектері арасында командалық жарыс.
Бүгін Арнаулы кітапхананың ұйымдастыруымен 3 желтоқсан – Халықаралық мүгедектер күніне орай Қалалық Зағиптар қоғамы клубы, Қызылорда облыстық Қазақ соқырлар қоғамының басқармасымен бірлесіп «Рухы күштілер» атты І-ІІ топ көз мүгедектері арасында командалық сайыс болып өтті. 1992 жылы БҰҰ Бас Ассамблеясы 3-ші желтоқсанды «Халықаралық мүгедектер күні» деп жариялаған болатын. Міне сол жылдан бастап дәстүрлі түрде аталған шара ұйымдастырылып келеді. Шараның мақсаты: көз мүгедектерінің уақыттарын тиімді әрі қызықты өткізу, қазақтың ұлттық мәдениетімен өнерін дамыту, салт-дәстүрін дәріптеу.Жарысқа қаламыздағы №8 облыстық арнайы санаториялық мектеп-интернатының ұстазы Абаева Рита Ерталапқызы, «Мереке» вокалды аспапты ансамбль әншісі Шүкіров Айбек, №5 Көру қабілеті бұзылған балаларға арналған мектеп-интернатының ұстазы Бисембаева Раушан Тұяққызы төрелік жасады. Сайысқа қатысушылар «Беу, қыздар-ай», «Сыр сұлулары», «Мейірім», «Шаңырақ» болып төрт топқа бөлініп, сайыстың шарттары бойынша бақ сынасты. Ереже бойынша 1-ші кезең топтың өз-өздерін таныстырса, 2-ші кезең өнер көрсету, 3-ші кезең мақал-мәтелдер айтудан жарыс, 4-ші кезең «Әуенді тап» болып төртке бөлінді. Жарыс өте тартысты өтті. Қазылар шешімі бойынша «Сыр сұлулары» тобы тапқырлық танытып 1 ші орынды иеленсе, «Беу, қыздар-ай» тобы 2 ші орынды, «Мейірім» тобы мен «Шаңырақ» тобының қатысушылары 3 ші орынмен бөлісті. Барлық қатысушыларға алғыс хаттар және бағалы сыйлықтар табысталды. Шараға демеушілік жасаған Қызылорда облыстық басқарма төрайымының міндетін уақытша атқарушы Байманова Бидайкүл ханымға жарысқа қатысушылар атынан алғысымызды білдіреміз.
