«Қайсар рухты қазақ» халық қаһарманы, Ұлы Отан соғысының ардагері, атақты партизан, жазушы Қасым Қайсеновтің туғанына 105 жыл толуына орай тұлға сағаты.
Бүкіл саналы ғұмырын туған елінің кәдесіне түгелімен жаратуға арнаған халқының сүйікті перзенті, Халық қаһарманы Қасым Қайсеновтің туғанына биыл 105 жыл толып отыр. Осы орайда бүгін Қызылорда облыстық зағип және нашар көретін азаматтарға арналған арнаулы кітапханасының оқу залында «Қайсар рухты қазақ» атты тағылым сағаты болып өтті. Кітапханашы А. Нұрлиева Қасым Қайсеновтің өмір жолы мен ерліктеріне тоқталып өтті. Кітапхана оқырманы Айнамкөз Сүйіндікова Сағи Жиенбаевтың «Аман бол, аға!» атты өлеңін оқып берді.
Елінің алдында ерен ерлігімен де, еңбегімен де көзге түсіп, ұлтының ірі тұлғасына айналған Қасым ағамыздың адами тұлғасы, биік парасаты жайлы келер ұрпаққа жеткізіп отыру біздің мақсатымыз. От пен оқтың ортасында жүріп қалам тартып, ерлік пен шығармашылықты ұштастыра білген Қасым ағамыз қазақ барда мәңгі жадымызда сақталмақ...
